नेपालगन्ज । जाजरकोट भूकम्पमा परी घाइते भएकामध्ये थप एकजनाको मृत्यु भएको छ। कर्णाली प्रदेश अस्पतालमा उपचाररत रूकुम पश्चिमको चौरजहारी नगरपालिका १ का २५ वर्षीय निरज विष्टको मृत्यु भएको हो।
उहाँको उपचारको क्रममा आज बिहान ८ बजे मृत्यु भएको हो। उहाँको आइसीयूमा उपचार भइरहेको अस्पताल प्रशासनले जनाएको छ। उहाँलाई शनिबार नेपाली सेनाकाे हेलिकप्टरमार्फत उपचारका लागि सुर्खेत ल्याइएको थियाे।
योसँगै रुकुम पश्चिममा भूकम्पमा परी मृत्यु हुनेको संख्या ५३ पुगेको छ भने जाजरकोटमा भूकम्पका कारण १०१ जनाको मृत्यु भएको छ।
