नेपालगन्ज । बाँकेको डुडुवा गाउँपालिकाको वडा नं. ६, आसमानपुरमा रहेको जयेन्दु बाल सुधार गृहमा थुनुवाका बीचमा आपसी झगडा र हानाहान हुँदा एक जनाको मृत्यु भएको छ भने १० जना घाइते भएका छन् । मृत्यु हुनेमा रुपन्देहीका सुलभ केसी रहेको बाँके प्रहरी प्रमुख एसपी सन्तोषसिंह राठौरले जानकारी दिनुभयो ।
गएराती थुनुवाका बीचमा झगडा हुँदा बाल सुधार गृहमा एक आपसमा हानाहान भएको बाँकेका प्रमुख जिल्ला अधिकारी बिपिन आचार्यले जानकारी दिनुभएको छ ।
प्रजिअ आचार्यका अनुसार आपसी हानाहानमा ११ जना घाइते भएका थिए । घाइतेलाई उपचारका लागि राती नै नेपालगन्ज मेडिकल कलेज शिक्षण अस्पताल अस्पताल नेपालगन्जमा पुर्याइएको थियो । उपचारका क्रममा एक जना थुनुवाको मृत्यु भएको हो । बाल सुधार गृहबाट कति थुनुवा भागे भन्ने यकिन हुन सकेको छैन । भागेका मध्ये २५ जना थुनुवालाई नियन्त्रणमा लिइएको प्रजिअ आचार्यले जानकारी दिनु भएको छ ।
बाल सुधार गृहमा २ सय ४५ जनाको आसपासमा थुनुवा रहेको जिल्ला कारागार बाँकेका प्रमुख जेलर अर्जुनजङ्ग शाहले जानकारी दिनु भएको छ । जेलर शाहका अनुसार संविधान दिवसका अवसरमा असोज ३ गते त्यहाँबाट ७ जना थुनुवाले माफी पाएर रिहा भएका थिए । भित्र रहेका थुनुवालाई गणना गर्न नसकिदा कति भागे भन्ने यकिन हुन सकेको छैन । प्रहरीले अहिले पनि बाल सुधार गृहभित्र जाने र थुनुवाको अवस्था बुझ्ने प्रयासमै रहेको प्रजिअ आचार्यले बताउनु भएको छ ।
