बाँके । अर्थमन्त्री जनार्दन शर्मा (प्रभाकर) ले नरैनापुर गाउपालिकाका ६ वटै वाडामा डिप बोरिङ जडान गर्ने प्रतिबद्धता गर्नु भएको छ । नेपालगन्जबाट सुर्खेत जाने क्रममा बिहिबार बिहान नरैनापुरका अध्यक्ष स्तियाक अहमद साहसंगको भेटघाटमा सो प्रतिबद्धता जनाउनु भएको हो ।
नरैनापुरमा लामो समय सम्म परेको खडेरीका कारण त्यस क्षेत्रमा लगाइएको धानबाली नष्ट हुन लागेको जानकारी अध्यक्ष शाहले गराउनु भयो । अध्यक्ष शाहको चिन्ता र चासोलाई सम्बोधन गर्दै अर्थमन्त्री शर्माले सक्दो सहयोग गर्ने आश्वासन दिनुभयो । काठमाडौं पुग्ने बित्तिकै सो सहयोग गर्ने प्रतिबद्धता सुनेपछि अध्यक्ष शाह खुसी हुनुभयो ।
अर्थ मन्त्री शर्माले भन्नु भयो, ´नरैनापुरको अवस्थाका बारेमा जानकारी भए पनि सरकारबाट कुनै पहल नहुनु चिन्ताको विषय हो । अब ६ वटै वडाका लागि डिप बोरिङको तत्काल व्यवस्था गरिन्छ । भारतीय सिमासंग जोडिएको नरैनापुरका नागरिकलाई शिक्षा र स्वास्थ्यमा पहुँच बढाउन पहल गर्छ । सुख्खा ग्रस्त क्षेत्रका लागि बिशेष व्याकेज ल्याइन्छ ।` अध्यक्ष शाहको मागलाई समर्थन गर्दै प्रेदेश सांसद कृष्णा केसी (नमुना) ले समेत अर्थमन्त्री शर्मालाई प्रतिबद्धताका लागि धन्यवाद दिनु भयो ।
