संवाददाता, नेपालगंज।
नेपालगंज बघौडा जोडने हुलाकी सडक निर्माणका क्रममा सडकमा परेको जग्गाको मुआब्जा वितरण कार्यमा ढिलाई भएको भन्दै जग्गाधनीहरुले गुनासो गरेका छन ।
लालपुर्जा (जग्गाधनी प्रमाण पत्र) भएको जग्गालाई बीचबाट काटेर कालोपत्रे सडक निर्माण गरेर सवारी आवागमन शुरु भईसकेको छ । तर आफुहरुले पाउनु पर्ने क्षतिपूर्ति बापतको मुआब्जा रकम समयमा नपाउँदा समस्या भएको जग्गाधनी रबीकान्त रस्तोगीले बताउनुभयो ।
उहाँले भन्नुभयो, ‘नेपालगंज २२ मा मात्रै १२ जना भन्दा बढीले जग्गाको मुआब्जा पाउन बाँकी छ, बीचमा सडक छ, वरीपरी बाँकी रहेको जग्गा समेत न प्रयोग गर्न सकिएको छ, न त विक्री गर्न नै । लालपुर्जा सबै बुझाएका छौं । मूल्याकंन समितिले निर्णय गरे अनुसार छिटो मुआब्जा दिए हुन्थ्यो । अर्थमन्त्रालय सम्म हाम्रो पहुँच छैन । बुझ्दा फाइल पुरा भएपछि बजेट माग गरेर दिन्छौं भन्छन ।’
यता हुलाकी राजमार्ग निर्देशनालय योजना कार्यालय नेपालगंजले भने मुआब्जा वितरणको कार्य कार्यालयको प्रक्रियामै रहेको बताएको छ ।
रेडियो मर्निङ्ग स्टार ९० मेगाहर्ज सगँ कुराकानी गर्दै कार्यालयका इन्जिनियर सूचना अधिकारी राम सागर हरिजनले माग गरेजति सरकारले बजेट पठाउन नसक्दा केही ठाउँमा मुआब्जा वितरणको काममा ढिलाई भएको बताउनुभयो ।
कार्यालयबाट गएका फाइलहरु माथि माथिल्लो तहका निकायबाट प्राथामिकता नदिईदाँ मुआब्जाको बजेट आफूहरु कहाँ कम आउने गरेको उहाँको भनाई छ । नेपालगंज बघौडा सडकको मर्मत, संम्भार अवधि २०७९ साउनमा सकिएपछि हुलाकी सडक हस्तान्तरणको प्रक्रियामा जानेछ ।
