बाँके । भेरी अस्पताल नेपालगंजको पीसीआर प्रयोगशालामा पछिल्लो ४८ घण्टामा गरिएको २ सय १२ नमुनाको परीक्षणमा ६० जनामा कोरोना पोजिटिभ पुष्टि भएको छ ।
शनिबार दिँउसो १२ः४० बजे अस्पतालले जारी गरेको सूचना अनुसार बाँकेका ३९ जना, बर्दियाका १२ जना, दाङका ४ जना रहेका छन् । यस्तै दैलेक, कैलाली, प्युठान, रुकुम पश्चिम र रोल्पका एक/एक जना रहेका छन् ।
प्रयोगशालामा प्राप्त ४८ हजार आठ सय ४७ जनाको स्वाब नमुना जाँच कार्य सकिएको छ ।
जाँच गरिएका नमुना मध्ये चार हजार दुई सय ७६ वटा नमुनामा कोरोना पुष्टि भएको छ भने पछिल्लो ४८ घण्टामा २१२ जनाको कोरोना परीक्षण गरिएको अस्पतालद्वारा जारी सुचनामा उल्लेख गरिएको छ ।
यस्तै बाँकेबाट शनिबार ४३ जना कोरोनामुक्त भई डिस्चार्ज भएका छन् । विभिन्न आइसोलेशनमा रहेका २९ जना पुरुष र १४ जना महिला कोरोनामुक्त भई डिस्चार्ज भएका हुन् ।
योसंगै बाँकेमा कोरोना संक्रमणबाट निको भई डिस्चार्ज हुनेको संख्या तीन हजार चार सय ७३ पुगेको स्वास्थ्य कार्यालय बाँकेका कोरोना सम्पर्क ब्यक्ति नरेश बाबु श्रेष्ठले बताउनुभयो ।
कोरोनाका कारण बाँकेमा ३८ जनाको मृत्युु भइसकेको छ । बाँकेमा बिरामी निको हुने दर ९५.२६ प्रतिशत, मृत्यु दर १.०१ प्रतिशत र रोगको प्रकोप दर ०.६१ प्रतिशत रहेको जिल्ला कोभिड– १९ संकट व्यवस्थापन केन्द्र (डीसीसीएमसी) बाँकेले जनाएको छ ।
