सबिता चन्द
नेपालगन्ज । बाँके क्षेत्र नं. २ प्रतिनिधि सभा सदस्य पदका उम्मेदवार दिपेन्द्र बिष्टले नेपालगन्ज उपमहानगरपालिका वडा नं. ६ मा घरदैलो कार्यक्रमलाई तीव्रता दिनु भएको छ। अब मतदान हुने दिन आउन मात्र १९ दिन बाँकी रहँदा चुनावी माहोल ह्वात्तै बढेको छ भने बस्ती–बस्तीमा राजनीतिक चहलपहल देखिन थालेको छ।
घरदैलोका क्रममा बिष्टले सर्वसाधारणसँग प्रत्यक्ष भेटघाट गर्दै उनीहरूको दैनिकी, समस्या र अपेक्षाबारे ध्यानपूर्वक सुन्नु भयो। विकास, रोजगारी, शिक्षा, स्वास्थ्य र सुशासनका विषयमा खुला संवाद गर्दै उहाँले “जनताको आवाज नै मेरो मार्गदर्शन हो” भन्ने धारणा दोहोर्याउनु भयो। स्थानीयले उठाएका प्रश्नमा स्पष्ट उत्तर र व्यवहारिक प्रतिबद्धताले माहोल अझ सकारात्मक बनेको देखिन्थ्यो।
नेपालगन्ज–६ का बासिन्दाहरूले विगतमा थन्किएका योजनाहरू, सेवा प्रवाहको ढिलासुस्ती र युवाको रोजगारीका समस्याप्रति चिन्ता व्यक्त गरे। त्यसमा प्रतिक्रिया दिँदै बिष्टले परिणाममुखी काम, पारदर्शी प्रक्रिया र स्थानीय सहभागितालाई प्राथमिकता दिने प्रतिबद्धता जनाउनु भयो। “विकास कागजमा होइन, जनताको जीवनमा देखिनुपर्छ,” उहाँको भनाइले घरदैलोमा उपस्थित धेरैको मन छोएको स्थानीयहरू बताउँछन्।
मतदान मिति नजिकिँदै जाँदा उम्मेदवारहरू मैदानमा सक्रिय देखिएका छन्। तर घरदैलो कार्यक्रममार्फत आम नागरिकसँगको आत्मीय संवादले चुनावी अभियानलाई अर्थपूर्ण बनाएको विश्लेषकहरूको टिप्पणी छ। यही संवाद र भरोसाको आधारमा नेपालगन्ज–६ मा बिष्टप्रति समर्थन बढ्दै गएको संकेत देखिएको छ।
अब १९ दिनपछि हुने मतदानले बाँके क्षेत्र नं. २ को भविष्यको दिशा तय गर्नेछ। घरदैलोमै आशा र विश्वास साटिरहेका दिपेन्द्र बिष्टको अभियानले अन्तिम परिणाममा कस्तो प्रभाव पार्छ, त्यो भने मतपेटिकाले नै बताउनेछ।
