सबिता चन्द
नेपालगन्ज । बाँके क्षेत्र नं. २ प्रतिनिधि सभा सदस्य पदका उम्मेदवार दिपेन्द्र बिष्टले डुडुवा गाउँपालिका वडा नं. ५ अन्तर्गत लडिया घाट र छग्रवाका स्थानीय बासिन्दासँग प्रत्यक्ष भेटघाट गर्नुभएको छ। घरआँगनमै पुगेर जनतासँग संवाद गर्दै उहाँले तारा चिन्हमा मतदान गरेर आफूलाई विजयी गराउन आग्रह गर्नुभएको हो।
लडिया घाटमा भएको भेटघाटका क्रममा स्थानीयले वर्षेनी दोहोरिने बाढीको समस्या, बस्ती विस्थापनको जोखिम र सुकुम्बासी जीवनको असुरक्षाबारे गहिरो पीडा पोखेका थिए। नदीको धार बदलिँदा घरबार जोखिममा पर्ने, खेतीयोग्य जमिन बग्ने र सुरक्षित बसोबासको अभावले जीवन कठिन बनेको उनीहरूको गुनासो थियो। यी कुरा ध्यानपूर्वक सुन्दै उम्मेदवार बिष्टले बाढी नियन्त्रण, सुरक्षित बसोबास र सुकुम्बासी समस्याको दीर्घकालीन समाधानलाई आफ्नो प्राथमिक एजेन्डा बनाउने प्रतिबद्धता व्यक्त गर्नुभयो।
“यहाँको पीडा केवल चुनावी मुद्दा होइन, मानवीय प्रश्न हो,” भन्दै बिष्टले अस्थायी राहतभन्दा स्थायी समाधानतर्फ केन्द्रित भएर काम गर्ने बताउनुभयो। नदी नियन्त्रण, पुनर्स्थापना र आधारभूत सेवामा पहुँच सुनिश्चित गर्न स्थानीय, प्रदेश र संघीय तहको समन्वय आवश्यक रहेको उहाँको धारणा थियो।
यही वडाको छग्रवामा पनि बिष्टले सर्वसाधारणसँग भेटघाट गर्दै उनीहरूको दैनिक जीवनका समस्या सुन्नुभयो। रोजगारीको अभाव, शिक्षा र स्वास्थ्य सेवामा पहुँचको कठिनाइजस्ता विषय उठाउँदै स्थानीयले विश्वासिलो प्रतिनिधित्वको अपेक्षा व्यक्त गरेका थिए। भेटघाटका क्रममा धेरैले तारा चिन्हमा मतदान गर्ने प्रतिबद्धता जनाउँदै बिष्टप्रति भरोसा देखाएका थिए।
तार्किक रूपमा हेर्दा, लडिया घाट र छग्रवामा देखिएको यो समर्थन केवल भावनात्मक होइन। निरन्तर जनसम्पर्क, समस्या सुन्ने धैर्य र समाधानतर्फ केन्द्रित प्रतिबद्धताले बिष्टलाई ‘दूरबाट निर्देशन दिने नेता’ होइन, ‘पीडासँगै उभिने प्रतिनिधि’ का रूपमा स्थापित गर्दै लगेको स्थानीयहरूको बुझाइ छ।
डुडुवा–५ मा भएको यो भेटघाटले बाढी र सुकुम्बासी समस्याजस्ता दीर्घकालीन चुनौतीलाई केन्द्रमा राखेर राजनीतिलाई समाधानमुखी बनाउने सन्देश दिएको छ। यही सन्देशका कारण यहाँको चुनावी माहोल क्रमशः तारातर्फ ढल्किँदै गएको छ ।
