सबिता चन्द
नेपालगन्ज । बाँके क्षेत्र नं. २ का प्रतिनिधि सभा सदस्य पदका उम्मेदवार दिपेन्द्र बिष्टले बुधबार नेपालगन्ज उपमहानगरपालिका वडा नं. १९ अन्तर्गत मनिकापुर क्षेत्रमा सघन भेटघाट र भलाकुसारी गर्नुभएको छ। उहाँको यो भ्रमण औपचारिक कार्यक्रमभन्दा फरक देखियो—मञ्चभन्दा खेत रोज्ने, भाषणभन्दा संवाद रोज्ने शैलीमा।
मनिकापुरका किसानहरू खेतमै व्यस्त भइरहँदा उम्मेदवार बिष्ट आफैँ खेतमा पुगेर उनीहरूका पीडा, समस्या र अपेक्षा सुन्नुभयो। सिँचाइ, मल–बिउ, बजार मूल्य र श्रमको अभावजस्ता विषय किसानहरूले खुला रूपमा राख्दा बिष्टले ध्यानपूर्वक सुन्दै “कृषकको पसिना नै देशको आधार हो” भन्ने धारणा राख्नुभयो। किसानका कुरा सुनेपछि उहाँले कृषि उत्पादनको उचित मूल्य, समयमै मल–बिउको व्यवस्था र स्थानीय स्तरमै बजार सुनिश्चित गर्ने प्रतिबद्धता जनाउनुभयो।
खेतको संवादपछि उम्मेदवार बिष्ट मनिकापुरका विभिन्न टोल–टोलमा पुगेर सर्वसाधारणसँग प्रत्यक्ष भेटघाटमा जुट्नुभयो। घरआँगनमै पुगेर जनताको कुरा सुन्ने शैलीले स्थानीयमा उत्साह थपिएको देखिन्थ्यो। वृद्धदेखि युवा, महिला देखि किसानसम्मले आफ्ना समस्या र सुझाव खुलेर राखे। भेटघाटका क्रममा पाएको आत्मीयता र माया देखेर उम्मेदवार बिष्टले आफू भावुक भएको प्रतिक्रिया दिनुभयो।
स्थानीयहरूका अनुसार बिष्टको यो उपस्थिति केवल चुनावी औपचारिकता होइन, भरोसा निर्माणको प्रयास हो। “उहाँ हाम्रो खेतमै आएर कुरा सुन्नु भयो, यस्तो नेता कमै देखिन्छ,” एक किसानले भने। यही अनुभूति धेरै घरआँगनमा सुनिन्थ्यो।
नेपाली कम्युनिस्ट पार्टीका नेता डिल्ली बराल (अमिर) ले मनिकापुरको समग्र माहोललाई “पूर्ण रूपमा तारामय” भएको बताउँदै गुडन्युज खबरसँग भन्नुभयो, “जनताले बिष्टलाई आफ्नै मान्छेझैँ अपनाएका छन्। यहाँको समर्थन स्वाभाविक र उत्साहजनक छ।”
खोजमूलक रूपमा हेर्दा, मनिकापुरमा देखिएको यो माहोल केवल भीडको उत्साह होइन, लामो समयदेखि सुन्न नपाएको आवाज सुन्ने प्रतिनिधिको खोजीको परिणाम हो। खेतदेखि टोलसम्म फैलिएको संवादले बाँके क्षेत्र नं. २ मा चुनावी बहसको केन्द्र अब नाराभन्दा व्यवहारतर्फ सर्दै गएको संकेत गर्छ। यही कारणले मनिकापुरमा देखिएको ‘तारा’को चमकलाई स्थानीयहरू परिवर्तनको संकेतका रूपमा लिन थालेका छन्।
