बर्दिया । बर्दिया जिल्लाको बढैयाताल गाउँपालिका–३, सिमारस्थित आशिष् चर्च परिसमा पौष १० गते असाधारण रूपमा जीवन्त देखिन्थ्यो। जाडो मौसमको चिसोपनाबीच पनि यहाँको वातावरण प्रेम, सद्भाव र मानवीय संवेदनाले न्यानो बनेको थियो।
येशु ख्रिष्टको जन्मको सम्झनामा मनाइने ख्रीष्टमस पर्वलाई आशिष् चर्च सिमारले केवल धार्मिक उत्सवका रूपमा मात्र होइन, सामाजिक उत्तरदायित्व र मानव सेवाको माध्यमका रूपमा मनाएको छ। त्यस दिन चर्च परिसरमा देखिएको उत्साह, अनुहारमा झल्किएको मुस्कान र आपसी अपनत्वले ख्रीष्टमसको वास्तविक सन्देशलाई जीवन्त बनाएको थियो।
ख्रीष्टमस मानवता, त्याग, प्रेम र क्षमाको पर्व हो। यसले मानिसलाई मानिससँग जोड्ने, पीडामा साथ दिने र आशाहीन अवस्थामा उज्यालो देखाउने सन्देश दिन्छ। यही भावनालाई आत्मसात् गर्दै आयोजना गरिएको कार्यक्रममा बढैयाताल गाउँपालिकाका उपाध्यक्ष लक्ष्मी अधिकारीको प्रमुख आतिथ्यता रहेको थियो। उहाँसँगै वडा नं. ३ का अध्यक्ष ललन अहिर, कार्यपालिका सदस्य चन्द्रकला विक, पास्टरका श्रीमती सोनु बराईली लगायत विभिन्न राजनीतिक दलका प्रतिनिधिहरू, समाजसेवी, धर्मगुरु तथा स्थानीय समुदायका करिब ३०० जनाको उल्लेखनीय उपस्थिति रहेको थियो। जनप्रतिनिधिदेखि सर्वसाधारणसम्मको सहभागिताले कार्यक्रमलाई अझ अर्थपूर्ण र प्रभावकारी बनाएको थियो।
कार्यक्रममा अतिथिहरूले ख्रीष्टमसको सार प्रेम र सेवामा रहेको उल्लेख गर्दै यस्ता सामाजिक कार्यक्रमहरूले समुदायमा आपसी विश्वास, सहकार्य र सद्भाव मजबुत बनाउने धारणा व्यक्त गर्नुभयो। धर्म, जात वा राजनीतिक विचारभन्दा माथि उठेर आयोजना गरिएको यस कार्यक्रममा सबै एउटै उद्देश्यका साथ सहभागी देखिन्थे—मानव सेवाको भावना फैलाउने।
कार्यक्रमको सबैभन्दा भावुक र प्रेरणादायी क्षण तब आयो, जब आशिष् चर्चका सदस्य १०५ वर्षका अमृत विकलाई सम्मान गरियो। एक शताब्दीभन्दा लामो जीवन यात्रा तय गरिसक्नुभएका अमृत विक संघर्ष, धैर्य र अनुभवका जीवित प्रतीक हुनुहुन्छ। उहाँलाई न्यानो कपडा ओढाइँदा उपस्थित सबैले सम्मानका साथ ताली बजाएका थिए। उहाँको आँखामा देखिएको भावनाले धेरैलाई मौन बनाएको थियो। अमृत विकसँगै अन्य ५ जना ज्येष्ठ नागरिकहरूलाई पनि सम्मानसहित न्यानो कपडा वितरण गरियो। यो सम्मान केवल सामग्री प्रदान गर्ने कार्य मात्र थिएन, यो समाजले आफ्ना अग्रजप्रति व्यक्त गरेको कृतज्ञताको भाव थियो।
कार्यक्रमले भविष्यतर्फ पनि उत्तिकै ध्यान दिएको देखियो। आशिष् चर्चको तर्फबाट ३० जना विद्यार्थीहरूलाई कापी तथा स्टेशनरी सामग्री वितरण गरिएको थियो। सीमित साधनस्रोतका बीच अध्ययन गरिरहेका ती विद्यार्थीहरूका लागि यो सहयोग सानो देखिए पनि यसको अर्थ निकै ठूलो थियो। उनीहरूको अनुहारमा देखिएको खुसीले शिक्षा नै समाज परिवर्तनको आधार हो भन्ने विश्वासलाई थप बलियो बनाएको थियो। यस्ता सहयोगले विद्यार्थीहरूमा आत्मविश्वास बढाउने र सपनातर्फ अघि बढ्न प्रेरणा दिने काम गर्छ।
यस अवसरमा भोलागौडीका समाजसेवी सहयोगदाता रामबहादुर बोहराको योगदान विशेष रूपमा स्मरणीय रह्यो। उहाँले विद्यार्थीहरूका लागि तीन दर्जन कापी र कलम सहयोग प्रदान गर्नुभएको थियो। कुनै प्रचार–प्रसार बिना, निस्वार्थ भावले गरिएको उहाँको सहयोगले समाजमा सकारात्मक सन्देश प्रवाह गरेको छ। यस्ता समाजसेवीहरूको कार्यले अरूलाई पनि सेवा र सहयोगतर्फ प्रेरित गर्ने काम गर्दछ।
आशिष् चर्च सिमारले आयोजना गरेको यो कार्यक्रमले धर्म र सेवाबीचको सुन्दर समन्वय प्रस्तुत गरेको छ। यहाँ कुनै भेदभाव थिएन, न कोही ठूलो न सानो। सबै एउटै मञ्चमा उभिएर मानव कल्याणको सन्देश फैलाइरहेका थिए। कार्यक्रममा सहभागी धर्मगुरुहरूले पनि धर्मको सार सेवा, करुणा र प्रेममा रहेको कुरा स्पष्ट रूपमा व्यक्त गर्नुभयो। जब धर्म व्यवहारमा उतारिन्छ, तब त्यसले समाजमा गहिरो सकारात्मक प्रभाव पार्छ भन्ने कुरा आजको कार्यक्रमले प्रमाणित गर्यो।
यस्ता कार्यक्रमहरूले स्थानीय समुदायमा दीर्घकालीन प्रभाव पार्छन्। यसले मानिसहरूबीच आपसी सम्बन्ध बलियो बनाउँछ, सामाजिक उत्तरदायित्वको भावना विकास गर्छ र समाजलाई एकताबद्ध बनाउँछ। आशिष् चर्च सिमारले विगतदेखि नै सामाजिक सेवा, सहयोग र मानवीय कार्यलाई निरन्तरता दिँदै आएको र आगामी दिनमा पनि यस्ता कार्यक्रमहरूलाई अझ विस्तार गर्ने प्रतिबद्धता जनाएको छ।
कार्यक्रमको अन्त्यमा आशिष् चर्च परिवारको तर्फबाट उपस्थित सम्पूर्ण अतिथि, जनप्रतिनिधि, समाजसेवी, सहयोगदाता तथा सहभागीहरूप्रति हार्दिक धन्यवाद व्यक्त गरियो। विशेषगरी उपाध्यक्ष लक्ष्मी अधिकारी, समाजसेवी रामबहादुर बोहरा तथा प्रत्यक्ष र अप्रत्यक्ष रूपमा सहयोग पुर्याउने सबैप्रति आभार प्रकट गरियो।
ख्रेष्टमस मनाइएको ख्रीष्टमस कार्यक्रम केवल एक दिनको उत्सवमा सीमित रहेन। यसले समाजमा प्रेम बाँड्ने, पीडामा साथ दिने र आशा जगाउने सन्देश छोडेर गएको छ। जब सम्मान, शिक्षा र सेवा एउटै ठाउँमा भेटिन्छन्, तब समाज परिवर्तनको दिशामा अघि बढ्छ। आशिष् चर्च सिमारले यस वर्षको ख्रीष्टमसमा यही सन्देश व्यवहारमा उतारेको स्थानिय समाजसेवी कुलबहादुर बिकले बताउनु भयो ।
