नेपालगन्ज । लुम्बिनी प्रदेसका सहरी विकासमन्त्री कृष्णा केसी ‘नमुना’ले सिकलसेल एनिमिया र थालेसिमिया रोगको निदान र उपचारलाई स्वास्थ्य बिमामा समावेश गर्न अनुरोध गर्नुभएको छ ।
बाँके निर्वाचन क्षेत्र नं. १ (१) बाट निर्वाचित मन्त्री केसीले बुधवार स्वास्थ्य बिमा वोर्ड काठमाडौं पुगेर वोर्डका कार्यकारी निर्देशक डा.दामोदर बसौलामार्फत् यस्तो अनुरोध गर्नुभएको उहाँको सचिवालयले जनाएको छ ।
वोर्डका कार्यकारी निर्देशक डा. बसौलासमक्ष मन्त्री केसीले हजारौं सिकलसेल एनिमिया र थालेसिमियाका बिरामीहरुको निदान र उपचार स्वास्थ्य बिमाको सुबिधा थैलीमा समावेश नगरिदा यस रोगका बिरामीहरुले औषधी खरिद गर्नुपर्ने भएको भन्दै स्वास्थ्य बिमाले प्रदान गर्ने निःशुल्क औषधीको सुबिधा थैलीमा सूचिकृत गर्नका लागि अनुरोध गर्नुभएको थियो ।
सिकलसेल र थालेसिमिया रोगको निदान र उपचारका लागि सरकारले स्वास्थ्य बिमामा समेटेपनि बिमा गरेका यस रोगका बिरामीहरुले निःशुल्क औषधी प्राप्त गर्न सकेका छैनन् । सिकलसेल र थालेसिमिया रोग लागिसकेपछि यसका रोगी विरामीले दीर्घकालीनरुपमा औषधी खानुपर्ने र औषधीसमेत अत्यन्तै महङ्गो हुनेहुँदा स्वास्थ्य बिमा वोर्डलाई निःशुल्क औषधीको सुबिधामा समेट्न आफूले अनुरोध गरेको मन्त्री केसीले बताउनुभयो ।
